ينتخبوك .. قصيدة لقائمة أتحاد الشعب .. للشاعر زهير الدجيلي

قائمة أتحاد الشعب

ينتخبوك ... حتى الكلمة الطيبة أ تصير , شمس المجلس .. صوت الناس .. الصوت المسموع ابغداد

ينتخبوك .. .
حتى الفرحة  .. الغابت بالعزيات ..  بلكي اتعود
 للمحرومين من الفرحة , ومن المايّ ومن الزاد
ينتخبوك  ...
حتى الشمس الغابت عن بغداد ,  بلكت ترجع !
أتشًك َ الغيم ,  وتشرق بعيون الأجواد
ينتخبوك .. .
حتى الحاكم يرحم شعبه , يرحم وطنه
وميحكمه  بسوط  الجلاد
ينتخبوك .. .
بلكت جيش المحتل يرحل , ايلمّ أجنوده   
 ايلمّ أفروخه   , ويرحل غاد عن بغداد
ينتخبوك .. .
حتى الأمل الباقي عدنا بلكت يخضر!
 بلكت يكبر ..!  بلكت تتحرر بغداد !
 من المحتل ,  من أيران
ومن الفاسد والمحتال
ومن الدوني والقوّاد .. بلكت تتحرر بغداد !
 ينتخبوك .. .
بلكت نخلص من ذاك المحتال  اللي ّ
صخّم وجهه وكال انا  وبس  , الحداد !
ينتخبوك ...
بلكت تصحى  هذي الدنيا ويطلع بدرك
 وبدرك عالي ويّ طلعة عيد الميلاد *
 ينتخبوك ..
حتى  تضوي اعيون الناس الصارت عمية
 من كثر الظلمة ابغداد
ينتخبوك ..
حتى  الشعب الغايب من اسنين ,
بلكت يرجع  صاحي , ويندل دربه
ويتحقق وعد الأجداد !
 ينتخبوك ..
بلكت هاي الدنيا تمطر
حتى تغسل وجه ااوطن الأملح 
من  وساخات  الأوغاد ..

كلشي أيصير ..
 لاتستغرب , كلشي يصير !!
عكب المحنة  .. هذي المحنة  الخلت ناسك موتى 
لازم شعبك يصحى  ويعلى صوته
ويعدل هذي الدنيا العوجا بصوته
 وينتخبوك ..
***     ***
 زهير الدجيلي
1آذار 2010
ــــــــــــــــــــــــ
* 31 آذار