وين دمك ضاع ؟

المقاله تحت باب  موقع الشاعر زهير الدجيلي
في 
09/04/2012 03:05 PM
 






مرور عام على استشهاده

وين دمّك ضاع ياكامل شياع ؟
 
 ومنهو ينطينا الجواب .. والوطن راح ابمتاهات الضياع ؟
 
والسؤال اللّي يظل ماله جواب ..
 
 أيصير جمرة بالكًلب تجوي كلساع
 
 وين دمك ضاع ياكامل شياع ؟
 
 ابياظليمة ؟..أ بياحريمة ؟ أبياجريمة من جرائم هالوطن البيها ضاع ؟
 
 أبيا سراب ؟ ابياخراب ؟
 
ابيانزيزة موت ماخلتّك حتى اتكًول فد كلمة وداع ؟!
 
 وين دمك ضاع ياكامل شياع ؟
 
أبيا جهة ؟ وبيا مقبرة بأرض العراق ؟
 
 الصار بيها ابنادم ابرخص التراب ..
 
 والجثث ترست الكًاع ؟
 
 أنباع ؟ ..
 
 منهو اللي اشترى دم الشهيد ابمية دولار وقتل ؟
 
 ومنهو اللّي باع ؟
 
وين دمّك ضاع ياكامل شياع ؟
 
 وين دمك يارفيقي اللّي رحت للوطن في مركب أمل مابيه شراع ؟
 
 لنته تقدر على طوفان الكذب
 
 ولنته سباّح وألك صولات في بحر الخداع !
 
كنت تتصور الجنة تنزرع ..
 
 في صحاري الموت مابين الذيابة والضباع
 
 وكنت تتصور بان الوطن يمكن يزدهر
 
 في ارض كل يوم بيها ينزرع موت الجياع
 
 وانته تعرف ليش هذا الوطن ضاع
 
 وأنته تعرف هالزمن ويّ الجبان ايروح مو ويّ الشجاع
 
 ولهذا يارفيقي دمك ودم كل شهيد بها الوطن ابرخص ضاع ..
 
 وين دمك ضاع ياكامل شياع ؟
 
منهو ينطينا جواب .. ؟
 
 و وين نسأل ؟
 
 أبيا حكومة ؟ .. أبيا وزارة .. أبيا رئاسة وبرلمان ؟
 
 والوشيعة ضايعة بين الطوايف , لازمان ولامكان !!
 
وحتى راس الخيط ضاع ..
 
 وين نسأل ؟
 
 ومنهو ينطينا الجواب بين كل هذا الخراب ؟
 
 والسؤال الليّ يظل ماله جواب
 
 يصير جمرة بالكًلب تجوي كلساع !
 
 ليش دمك ضاع ياكامل شياع ؟
 
وي دم الوطن ضاع ....
 
 
 
 زهير الدجيلي 18 أغسطس 2009